Қазақстан Республикасы Қаржы министрлігінің Мемлекеттік кірістер комитеті сыртқы туризмді дамыту мақсатында «Tax Free» пилоттық жобасын жүзеге асыруда. Бұл жоба шеңберінде шетелдік туристер Қазақстан Республикасында сатып алынған тауарларды Еуразиялық экономикалық одақ шекарасынан шығарған кезде ҚҚС сомасын қайтарып алады, егер тауарлардың жалпы сомасы 20 МРП-дан асса.
2025 жылдың 13 қаңтарындағы Қазақстан Республикасы Қаржы министрінің №11 бұйрығына сәйкес пилоттық жобаның әрекеті ағымдағы жылдың соңына дейін ұзартылды.
2025 жылы 1 МРП=3932 теңге, яғни ҚҚС қайтару, егер сатып алынған тауарлар сомасы 78640 теңгеден асатын болса, жүзеге асырылады.
«Tax Free» пилоттық жобасына Астана, Алматы, Шымкент және Түркістан қалаларындағы әлемдік брендтермен жұмыс істейтін сауда орталықтары қатысады.
Компенсация алу үшін шетелдік турист «Tax Free» чегін кеден бекетінің қызметкеріне ұсынады. Компенсация сомасы Алматы, Астана, Шымкент немесе Түркістан халықаралық әуежайларында шекараны кесіп өткен кезде кеден қызметкері мөр басқаннан кейін түседі.
Осы кезде келесі талаптар сақталуы тиіс: шетелдік мемлекет ЕАЭО-ға мүше мемлекет емес; «Tax Free» чегі мемлекеттік кірістер органының жеке нөмірлі мөрімен болуы тиіс; сатып алынған тауарлардың жалпы құны 20 МРП-дан асуы керек; сатып алынған тауарларды ЕАЭО-дан тыс жерге шығару жүргізілуі тиіс; «Tax Free» чегі рәсімделген күннен бастап үш айдан аспауы керек.