Қазақстан Ресей мен Беларусьпен кедендік баждар бойынша кедендік есеп айырысуларды ресей рубльінде жүргізуді жоспарлап отыр. Бұл норманы Мәжіліс қарауына Ұлттық банк төрағасы Тимур Сулейменов ұсынды, деп хабарлайды Kapital.kz бизнес ақпарат орталығы.
Ақша-кредиттік реттеушінің айтуынша, Қазақстанның Ұлттық банкі 2014 жылғы 29 мамырдағы Еуразиялық экономикалық одақ туралы келісімге өзгерістер енгізу хаттамасын ратификациялау туралы ҚР Заңының жобасын әзірледі. Хаттама 2023 жылдың қараша айында мемлекет басшылары тарапынан қол қойылды.
«Хаттамада Еуразиялық экономикалық одақ туралы келісімге Ресей Федерациясы мен Беларусь Республикасымен кедендік баждар бойынша есеп айырысуларды ресей рубльінде екі жыл мерзімге уақытша жүзеге асыру механизмін анықтау бөлігінде өзгерістер енгізілді. Бұл шешім Ресей Федерациясы мен Беларусь Республикасына қатысты енгізілген санкциялық шектеулердің нәтижесінде АҚШ долларында есеп айырысудың мүмкін еместігіне байланысты қабылданды», - деді Тимур Сулейменов.
Сонымен қатар, кедендік баждар сомаларын мемлекеттердің бюджетіне бөлу және есепке алу механизмі өзгеріссіз қалды, деп атап өтті ол.
«Қабылданған механизм Еуразиялық экономикалық одаққа мүше мемлекеттердің бюджетіне кедендік баждарды үздіксіз есепке алуды қамтамасыз етуге мүмкіндік берді. Жоғарыда айтылғандарды ескере отырып, Қазақстан Республикасының Заңының жобасын бекітуді сұраймыз», - деді Ұлттық банк төрағасы депутаттарға.