Алматыда Қазақстан Республикасының Сауда және интеграция министрі Арман Шақкалиевтің Иранның Сауда, тау-кен және өнеркәсіп министрінің орынбасары, Сауда дамыту ұйымының басшысы Мохаммад Али Дехган Дехнави мырзамен кездесуі өтті. Кездесуде екі ел арасындағы өзара тауар айналымын арттыру мәселелері талқыланды.
Министр Иранның Қазақстан үшін Таяу Шығыстағы негізгі серіктес екенін атап өтіп, Қазақстан Иранмен тауар айналымын 3 миллиард долларға дейін арттыруға дайын екенін, 60-тан астам тауар түрін ұсынатынын мәлімдеді. Тізімге дәнді дақылдар, күнбағыс майы, ет және басқа да тауарлар кіреді.
Ақпан айында Тегеранда сауда-экономикалық миссия мен бизнес-форум өтеді, бұл елдер арасындағы екіжақты байланысты одан әрі нығайтады, Қазақстандық өндірушілер мен ирандық сатып алушылар арасында тікелей байланыстар орнатуға көмектеседі, сонымен қатар Қазақстанның экспорттық әлеуетін кеңейтуге мүмкіндік береді.
2024 жылы Қазақстан мен Иран арасындағы тауар айналымы 296 миллион долларды құрады, бұл 2023 жылмен салыстырғанда 8,1%-ға артық. Қазақстаннан Иранға экспорт та 29,1%-ға өсіп, 100,6 миллион долларды құрады. Қазіргі уақытта Қазақстаннан Иранға жеткізілетін негізгі тауарлар - арпа, бидай, рапс тұқымы, жүгері, күнбағыс майы және әртүрлі ет сорттары.