Қазақстанның ұлттық спорт түрлері қауымдастығының құрылтайшылары жаңа жарғыны бірауыздан бекітті және жаңа президентті сайлады. Ол - Еркебұлан Ильясов, деп хабарлайды ҚР Туризм және спорт министрлігінің Спорт және дене шынықтыру істері комитетінің баспасөз қызметі.
1 ақпанда Қазақстан Республикасының ұлттық спорт түрлері ұлттық қауымдастығының кезектен тыс жалпы жиналысы өтті. Жиналысқа ҚР Туризм және спорт вице-министрі Серік Жарасбаев, сондай-ақ республикалық ұлттық спорт федерацияларының басшылары мен өкілдері қатысты.
Жиналыс барысында қауымдастықтың қазіргі президенті Исламбек Салжанов соңғы 2 жылдағы жұмыстың нәтижелерін қорытындылап, атқарылған жұмыстар туралы егжей-тегжейлі есеп ұсынды. Қауымдастықтың құрылтайшылары дауыс беру нәтижесінде жаңа жарғыны бірауыздан бекітіп, жаңа президентті сайлады. Ол - Еркебұлан Сайдуллаулы Ильясов.
Еркебұлан Сайдуллаұлы Ильясов 1985 жылғы 23 қазанда дүниеге келген. «Электр энергетикасы» мамандығы бойынша Алматы энергетика және байланыс институтын бітірген.
2008 жылдың маусымынан 2008 жылдың желтоқсанына дейін «Кентау трансформатор зауыты» АҚ бас конструктор бөлімінің инженер-конструкторы болып жұмыс істеді.
2009-2010 жылдары 35-110 кВ қуат трансформаторларын өндіру жобасының жетекшісі болды.
2010-2016 жылдары Alageum Electric АҚ басқарушы компаниясының бас директордың орынбасары қызметін атқарды.
2016 жылдан бастап AlageumGroup ЖШС-нің бас директоры, директорлар кеңесінің төрағасы болып тағайындалды.