Бұл қарқын әлемдегі жетекші экожүйелердің көрсеткіштерімен, мысалы, АҚШ және Қытаймен салыстыруға болады.
Digital Almaty 2025 халықаралық форумында стартаптар мен венчурлық инвестициялар платформасының негізін қалаушы және бас директоры Йорам Вийнгаарде Қазақстанның жаһандық инновациялар нарығындағы өсіп келе жатқан рөлін атап өтті. Ол еліміздің Орталық Азияның стартап-экожүйесінде маңызды ойыншы болып, өңірге бағытталған венчурлық инвестициялардың 15-20% құрайтынын ерекше айтты.
Вийнгаарде мырзаның айтуынша, Қазақстан технологиялық сектордың өсімін көрсетуде әсерлі қарқынға ие. Ол $10 миллиардтан жоғары бағаланатын «декакорн» компанияларының пайда болуына ерекше назар аударды. Мұндай табыстың мысалы ретінде Kaspi.kz компаниясын атады.
«Қазақстан тек АҚШ-ты «декакорндардың» пайда болу динамикасы бойынша қуып жетіп қана қоймай, озып та кетіп жатыр, бұл жергілікті экожүйенің халықаралық инвестицияларды тарту және әлемдік деңгейдегі компанияларды құру үшін жоғары әлеуетке ие екенін көрсетеді», — деп атап өтті ол.
Dealroom.co аясында 101 қазақстандық стартап талданды. Вийнгаарде Astana Hub-пен ынтымақтастықтың деректер базасын едәуір кеңейтіп, жергілікті стартап-экожүйесінің мүмкіндіктерін тереңірек бағалауға мүмкіндік беретініне сенімді.
Қазақстанның Dealroom.co платформасына интеграциялануы халықаралық инвестицияларға және серіктестіктерге қолжетімділікті ашады, бұл стартаптардың дамуын, глобалдық нарықтарға шығуын жеделдетуге және елдің инновациялық әлеуетін нығайтуға ықпал етеді.
Digital Almaty 2025 31 қаңтар — 1 ақпан аралығында «Атакент» көрме кешенінде өтеді. Форумды ұйымдастырушылар: ҚР Цифрлық даму, инновациялар және аэроғарыш өнеркәсібі министрлігі, ҚР Сыртқы істер министрлігі, Алматы әкімдігі және АКФ «Инновациялық технологиялар паркі».