Қазақстан Республикасы Үкіметінің баспасөз қызметінің мәліметінше, қазіргі уақытта жаңарту Қытай, Өзбекстан және Түрікменстанмен шекарада орналасқан 9 бақылау-өткізу пунктін қамтыды.
Модернизация нәтижесінде пункттердің өткізу қабілетін 6 есеге — тәулігіне 170-тен 960 көлік құралдарына дейін арттыру жоспарлануда, сондай-ақ шекарадан өту уақытын 30 минутқа дейін қысқарту көзделуде. Барлық 9 пунктті жаңартуды ағымдағы жылы аяқтау жоспарлануда.
Сонымен қатар, Еуразиялық экономикалық одақтың сыртқы шекарасындағы 10 автокөлік бақылау пунктінде автоматтандырылған электронды кезек жүйесі енгізілді. Ол «Qoldau.kz» платформасы мен «CargoRuqsat» мобильді қосымшасы арқылы қолжетімді.
Электронды кезектің қолданылуы республикалық жолдар бойында автокөліктердің жиналуын болдырмауға және жүк тасымалдау процесінің ашықтығын қамтамасыз етуге мүмкіндік берді.