Қытай АҚШ-тан импортталатын көмір, сұйытылған табиғи газ, мұнай, ауыл шаруашылығы техникасы және автомобильдерге баж салығын енгізетінін сейсенбі күні Қытай Халық Республикасының Қаржы министрлігі хабарлады, деп жазады Интерфакс-Қазақстан.
Көмір мен газға 15% мөлшерінде, ал мұнай, ауыл шаруашылығы техникасы және автомобильдерге 10% мөлшерінде баж салығы салынады, делінген хабарламада.
Сондай-ақ, вольфрамды құрамында бар өнімдерге экспорттық бақылау шаралары енгізілуде. Бұдан басқа, Қытай билігі «сенімсіз» ұйымдардың тізіміне Calvin Klein, Tommy Hilfiger және Van Heusen брендтеріне иелік ететін PVH Corp. пен генетикалық тестілеу саласында өнімдер мен қызметтер жеткізушісі Illumina Inc. компаниясын қосты.
Бұл шаралар Вашингтонның сейсенбіден бастап қытай тауарларына импорттық баж салығын көтеру туралы хабарламасына жауап ретінде қабылданды.
«АҚШ-тың біржақты баж салығын енгізуі Дүниежүзілік сауда ұйымының ережелерін ауыр түрде бұзады, - делінген Қытайдың Қаржы министрлігінің мәлімдемесінде. - Бұл тек олардың өз проблемаларын шешуіне көмектеспейді, сонымен қатар Қытай мен АҚШ арасындағы қалыпты экономикалық және сауда ынтымақтастығын бұзады».
Қытайдың Валюта бақылау басқармасы (State Administration of Foreign Exchange, SAFE) сейсенбі күні Alphabet Inc.-ке тиесілі америкалық Google-ге қарсы антимонополиялық заңнаманы бұзу фактісі бойынша тексеру бастады.
Google-дің іздеу және басқа да қызметтері 2010 жылдан бері Қытайда пайдаланушыларға қолжетімсіз, алайда компания елде онлайн жарнама саласында бірқатар операцияларды сақтап отыр.
Дүйсенбі күні АҚШ президенті Дональд Трамп журналистерге Пекинмен келесі 24 сағат ішінде келіссөздер жүргізілуі мүмкін екенін хабарлады.
Ақ үйдің баспасөз хатшысы Кэролайн Левитт Fox News эфирінде Трамп пен Қытай Халық Республикасының төрағасы Си Цзиньпин арасында әңгіме болуы тиіс екенін айтты.
«Президент (...), келесі 24 сағат ішінде Си мырзамен сөйлесуді жоспарлап отыр», - деп хабарлады Кэролайн Левитт.
Сонымен қатар, Дональд Трамп сейсенбіге жоспарланған Мексика мен Канада тауарларына 25% баж салығын енгізуді кейінге қалдырды.