Швецияда Қазақстан Республикасының ІІМ Ұлттық орталық бюросының сұрауымен 38 жастағы ер адам халықаралық іздеуде жүрген, аса ірі көлемдегі ұрлық жасағаны үшін ұсталды, деп хабарлайды Polisia.kz.
2018 жылдың қазанында күдікті аударымдармен байланысты алаяқтық арқылы Алматыдағы банктің бірінен 55 миллион теңге ұрлап кеткен.
«Қазіргі уақытта күдікті шетелде қамауда отыр», - делінген хабарламада.
Бұған дейін Генеральды прокуратура мен Интерпол қызметкерлері Сербиядан Қазақстан азаматын аса ірі көлемдегі алаяқтық үшін экстрадициялағаны туралы хабарланған. Күдікті 2018-2019 жылдар аралығында арнайы техника сату туралы жалған хабарландырулар жариялау арқылы төрт азаматтың ақшасын ұрлап, оларға 205 мың доллар көлемінде зиян келтірген. Қылмыс жасағаннан кейін күдікті жасырынған, халықаралық іздеуге жарияланған, ал 2023 жылы Сербия аумағында ұсталған.