2025 жылы сегіз сала бойынша 336 мамандықты қамтитын 60 кәсіби стандарттың әзірленуі мен жаңартылуы жоспарланған. 2024-2026 жылдарға арналған жоспар бойынша 1371 мамандықты қамтитын 250 кәсіби стандарт әзірлеу көзделген. Бұл туралы үкімет отырысында өнеркәсіп министрі Қанат Шарлапаев хабарлады, деп жазады Kapital.kz бизнес ақпарат орталығының тілшісі.
«Биыл біз кәсіби стандарттарды әзірлеуде жасанды интеллект технологияларын қолдану арқылы жаңа тәсілді сынақтан өткізуді жоспарлап отырмыз, бұл процесс әзірлеуді едәуір жеңілдетіп, қысқартуға мүмкіндік береді. Егер сынақ сәтті өтсе, бұл тәсіл кеңейтіледі», - деді ол.
Өнеркәсіп саласында кадрларды дуалды оқыту арқылы даярлау 284 колледжде жүзеге асырылуда, мұнда 700-ден астам өнеркәсіп кәсіпорны жұмыс істейді. Кәсіпорындармен жасалған келісімдер мен меморандумдар аясында 30-дан астам білім беру бағдарламалары іске асырылуда. Нәтижесінде жыл сайын 13 мыңнан астам жас маман тұрақты жұмысқа орналасады.
«Сондай-ақ, жүйелі негізде мыңдаған мектеп оқушыларына кәсіби бағдар беру шаралары ұйымдастырылуда. 2024 жылы 2 мыңнан астам студент өнеркәсіп кәсіпорындарында тәжірибе өтті. Алдыңғы қатарлы білім беру технологияларын енгізу мақсатында халықаралық серіктестікті дамыту жалғасуда. Мысалы, 2024 жылы Allur Group Германияның Эрфурт университетімен бірлесе отырып, Дуалды оқыту халықаралық орталығын құрды», - деп хабарлады Қанат Шарлапаев.
2024 жылы Таразда «Қазфосфат» қолдауымен Д.И. Менделеев атындағы Ресей химия-технология университетінің филиалы ашылды. Алдағы уақытта жаңа кәсіпорындарға дуалды білім беруді кеңейту мен енгізу жоспарлануда.
«2019 жылдан бері Отбасы банкі өндірісте жұмыс істейтін адамдарға қолжетімді тұрғын үй қамтамасыз ету мақсатында корпоративтік бағдарламаны жүзеге асырып келеді. Екі жылда 122 қызметкер тұрғын үймен қамтамасыз етілді. Сонымен қатар, ауылдардан кадрлардың кетуін азайту мақсатында, қызметкерлері үшін тұрғын үй салған жұмыс берушілердің шығындарын субсидиялауға арналған механизм қарастырылған», - деп нақтылады өнеркәсіп министрі.
Бүгінгі күні геология саласында кадр тапшылығы байқалады. Қатты пайдалы қазбаларды барлау бойынша бес мамандықты даярлауды еліміздегі жалғыз Абай облысындағы Геологиялық барлау колледжі жүзеге асырады.
«Геолог мамандығын насихаттау және жастар тарапынан қызығушылықты арттыру үшін «Жас геолог» қоғамдық қоры құрылды, ведомстволық награданың мемлекеттік «Еңбек сіңірген геолог» мәртебесіне ауыстырылды. Сондай-ақ, құрылыс саласында да жұмыстар жүргізілуде. Соңғы екі жылда 400-ден астам маман Қазақстан құрылысшылар қауымдастығымен және BI University-мен серіктестік аясында біліктілікті арттыру курстарынан өтті», - деді министр.
Өткен жылы WorldSkills Kazakhstan чемпионатына 550 колледж студенті қатысты, олардың 108-і еліміздің жетекші компанияларынан жұмысқа шақыру алды.