Премьер-министр Олжас Бектенов министрліктерге өнеркәсіп, энергетика, көлік, ауыл шаруашылығы, су ресурстары бойынша бірлесіп, кәсіпорындар, әкімдіктер және Отбасы банкпен жұмысшы кадрлар үшін жеңілдетілген ипотекалық және жалға алу бағдарламаларын іске қосу мәселесін қарастыруды тапсырды, деп хабарлайды Kapital.kz бизнес ақпарат орталығының тілшісі.
«Кәсіби жұмысшы кадрлары – экономиканың негізгі өндірістік күші. Заманауи жұмысшылар жоғары технологиялық жабдықтарды, автоматтандырылған жүйелерді басқарады. Бұл үздіксіз біліктілікті арттыру, интеллектуалдық, цифрлық және жеке дағдыларды дамыту процесін талап етеді. Бізге мыңдаған білікті жұмысшылар қажет. Әр жыл сайын жаңа мамандықтар пайда болады», - деді премьер.
Болашақ дағдылар мен құзыреттерді болжау үшін барлық әкімдіктерге өңірлік мамандық атластарын қалыптастыру қажет.
«Қазіргі уақытта тек тоғыз өңірде мұндай құжаттар бар. Жастардың жұмысшы мамандықтарын саналы түрде таңдауы үшін кәсіби бағдар беру жұмысында жаңа тәсілдерді жүзеге асыру қажет. Болашақ маман өз кәсіби перспективаларын көруі үшін мектептер, колледждер, кәсіпорындар арасында өзара әрекеттестік моделін құру керек. Осы мақсатта білім министрлігі техникалық және кәсіби білім беру саласын сапалы түрде трансформациялауы тиіс», - деп атап өтті Олжас Бектенов.
Жаңа мамандар нарықта сұранысқа ие болуы тиіс. Мемлекет тарапынан колледждерде оқыту қаржыландыруы екі есе артты. Халықаралық талаптарды ескере отырып, жаңа білім беру бағдарламалары енгізілуде. Сонымен қатар, Астана әкімдігімен бірлесіп, құзырет орталығын құру жоспарлануда.
«Сонымен қатар бизнес, жұмыс берушілер мен инвесторлар тарапынан да шаралар қабылдануы керек. Мұндай жұмыстарды «Самұрық-Қазына» қорына белсенді түрде жүргізу қажет. Жұмысшы кадрларды әлеуметтік қолдаудың үздік корпоративтік практикаларын тарату, оларға жаңа ынталандыруларды кеңейту және енгізу керек», - деп атап өтті премьер.
Оның айтуынша, тағы бір маңызды бағыт – жұмысшы мамандықтарының ел экономикасындағы маңыздылығын түсіндіретін ауқымды ақпараттық науқан жүргізу.
«Бұл мәдениет және ақпарат министрлігіне салалық министрліктер мен ассоциациялар, кәсіподақтармен бірлесе отырып, атқаратын міндет. Жалпы, мүдделі мемлекеттік органдар, әкімдіктер, ұлттық компаниялар мен кәсіпорындар жұмысшы мамандықтарының жылын өткізу бойынша салалық және өңірлік жоспарлардың сапалы іске асырылуын қамтамасыз етуі қажет. Барлық іс-шаралар жүйелі, нәтижелі және ұзақ мерзімді әлеуметтік-экономикалық әсерге ие болуы тиіс. Үкімет жұмысшы мамандықтарының жылын өткізуді тұрақты бақылауда ұстайды», - деп қорытындылады Олжас Бектенов.