Kazakh Tourism баспасөз қызметі «Үздік туристік ауыл — 2025» ұлттық конкурсының аяқталғаны және қорытынды шығарылғаны туралы хабарлайды. Қазақстанның бес үздік туристік ауылы анықталды, олар жыл сайын БҰҰ Дүниежүзілік туристік ұйымының қамқорлығымен өтетін UN Tourism Best Tourism Village халықаралық конкурсында елді таныстыратын болады.
Конкурсты өткізу ауылдық жерлердің ерекше табиғи ландшафттарын, мәдениетін, дәстүрлерін және қолөнерін анықтау мен ілгерілетуге, сондай-ақ туристік саланы дамытуға бағытталған.
Конкурсқа әкімдіктер өңірден үш қатысушыны ұсынуға құқылы болды. Ауылдардағы дәстүрлі қызмет түрлерінің сақталуына, сондай-ақ саяхатшыларды жаңа маршруттармен қызықтыратын орталыққа айналуы мүмкін табиғи және мәдени ресурстарға ерекше назар аударылды.
Нәтижесінде Қазақстанның бес үздік ауылы аталды:
Лепсі (Жетісу облысы, Алакөл ауданы),
Нағи Ілиясов (Қызылорда облысы, Сарыдария ауданы),
Хан Ордасы (Батыс Қазақстан облысы, Бөкейорда ауданы),
Поперечное (Шығыс Қазақстан облысы, Риддер ауданы),
Шабанбай би (Қарағанды облысы, Актогай ауданы).
2023 жылы Алматы облысындағы Саты ауылы халықаралық деңгейде ең үздік туристік ауыл ретінде танылып, UNWTO тарапынан Best Tourism Villages беделді сыйлығын алды.