Мектеп Атырау облысында қайтарылған қаржы есебінен салынады. Бұл мақсаттарға 2 миллиард теңге бөлінеді, деп хабарлайды Primeminister.kz.
Мемлекет басшысының тапсырмасымен еліміздің өңірлерінде әлеуметтік маңызы бар жобаларды жүзеге асыру жұмыстары арнайы мемлекеттік қордың қаражатынан «Мемлекетке заңсыз алынған активтерді қайтару туралы» Заң аясында жалғасуда.
«Үкімет 150 орындық мектепті Атырау облысының Қызылқоға ауданындағы Жамансор ауылында салу үшін 2 миллиард теңге бөлу туралы шешім қабылдады. Қазіргі уақытта онда 60 орындық бейімделген ғимаратта орналасқан тек бастауыш мектеп жұмыс істейді. 4-сыныпты аяқтағаннан кейін ата-аналар оқушыларды 60 км қашықтықтағы Доссор ауылында орналасқан С. Шарипов атындағы интернатқа апаруға мәжбүр. Жоғары сынып оқушылары да көрші елді мекендерде білім алады», - делінген хабарламада.
Жобаны жүзеге асыру нәтижесінде балаларды сапалы біліммен қамтамасыз ету үшін талаптарға және санитарлық нормаларға сай жағдайлар жасалады.
Бұған дейін үкімет спорттық кешенді Зеренда ауылында, Темірлан ауылында музыкалық мектеп, Арқалықта дарынды спортшыларға арналған спорттық кешен, Астанада тірек-қимыл аппараты бұзылған балаларға арналған реабилитациялық орталық, Алматыда мүмкіндігі шектеулі жандарға арналған жаттығу орталығы, Ақтөбеде ерекше балаларға арналған арнайы балабақша, Риддерде көпсалалы аурухана кешенінің құрылысын аяқтау жобаларына қаржы бөлуді шешкен болатын.