Токаев ЕНУ студенттерінің үйін аралады.
Мемлекет басшысы Еуразиялық ұлттық университетінің студенттер, магистранттар және докторанттар үшін арналған 2656 орындық жаңа жатақханасын қарап шықты.
Мемлекеттік-жекеменшік серіктестік аясында салынған студенттер үйі үш заманауи блоктан тұрады. Әр блок коворкинг аймақтары, кітапханалар, спорттық және коммерциялық кеңістіктермен жабдықталған, бұл тұрғындар мен студенттер үшін барынша қолайлы жағдайлар жасауға мүмкіндік береді.
Жатақхана құрылысы ерекше қажеттіліктері бар студенттердің сұраныстарын ескере отырып жүзеге асырылды. Дизайн мен инфрақұрылым толықтай кедергісіз орта талаптарына жауап береді.
Ғылым және жоғары білім министрі Президентке елде шетелдік жоғары оқу орындарының филиалдарын ашу арқылы академиялық хаб құру және студенттерді жатақханамен қамтамасыз ету шаралары туралы баяндады.
Президент атқарылып жатқан жұмыстарды оң бағалап, білім және жастар алмасу саласындағы халықаралық ынтымақтастықтың маңыздылығына назар аударды. Ол сондай-ақ қоғамда алаңдаушылық тудыратын метапневмовирус туралы пікір білдірді.
– Қазір барлығы жаңа инфекция туралы айтып жатыр. Ажитация туғызудың қажеті жоқ. Қытаймен ынтымақтастықты одан әрі дамыту керек, – деді Мемлекет басшысы.
Студенттермен әңгімелесу барысында Қасым-Жомарт Тоқаев Ana tili газетіне берген сұхбатында цифрландыру мен елдегі жасанды интеллектінің дамуына ерекше тоқталғанын атап өтті. Оның айтуынша, бұл озық технологиялар барлық салаларға енгізілетін болады. Президент жастарға ерекше үміт артатынын айтты.
Өткен жылы елде 11 079 орынға арналған 40 жатақхана пайдалануға берілді. Биыл Астанада 3400 орындық 7 жатақхананы іске қосу жоспарланып отыр.
Бүгінгі таңда ЕНУ-да жалпы сыйымдылығы 4280 орынға жететін сегіз студенттер үйі бар. Сонымен қатар, университет сегіз жеке жатақханамен ынтымақтасуда. 2025 жылға дейін жалпы орын саны 10 000-ға дейін артып, барлық қала сыртындағы студенттерді тұрғын үймен толық қамтамасыз ету мәселесін шешуге мүмкіндік береді.