Алматыда Біртұтас бейнемониторинг жүйесіне 45 мың бейнекамера қосылды, деп хабарлайды Kapital.kz бизнес ақпарат орталығының тілшісі қала цифрландыру басқармасының деректеріне сілтеме жасап.
ЕСБЖ жобасының негізгі мақсаты – қаладағы барлық бейнебақылау камераларын бір платформада біріктіру, осылайша нақты уақыт режимінде бейнеаналитиканы қалыптастыру және алынған бейне ағындарын көп мәрте пайдалану.
«Бейнеаналитика түтіннің, оттың, тастап кеткен заттардың, табиғи және техногендік сипаттағы төтенше оқиғалардың, киімнің, жыныстың және беттердің танылуы негізінде қалыптасады. Қазіргі уақытта 603 мемлекеттік және 906 жеке объектіден бейне ағындарын ЕСБЖ-ға шығару жұмыстары жүргізілуде», - деп хабарлады басқарма.
2024 жылдың екінші тоқсанында «Сергек» интеллектуалды қауіпсіздік жүйесінің 300 аппараттық-бағдарламалық кешені қосымша орнатылды.
Қазіргі уақытта қалада 9034 бейнекамерадан тұратын 1641 «Сергек» кешені жұмыс істеп жатыр.
Еске сала кетейік, жыл басында Алматыға жұмыс сапары кезінде президент Қасым-Жомарт Тоқаев мегаполистің өмірі туралы ақпаратты нақты уақыт режимінде алуға мүмкіндік беретін Қалалық жағдайлар орталығын қарап шықты. Әкім Ерболат Досаев мемлекет басшысына орталық Big Data талдау негізінде сапалы шешімдер қабылдау және Open Data концепциясын енгізу үшін тиімді құрал болатынын айтты. «Жасанды интеллект азаматтардың әл-ауқатын, әсіресе Алматы тұрғындарының әл-ауқатын арттыруға қызмет етуі керек. Сондықтан мен жасанды интеллект құралдарын енгізу жоспарларыңызды қолдаймын. Бұл бірінші. Екіншіден, қаладағы транспорттық жағдайға ерекше назар аудару қажет. Бұл көзге көрінетін проблема. Мұнда жасанды интеллект өз рөлін атқаруы тиіс. Әрине, қауіпсіздік. Қауіпсіздік бірінші орында болуы керек», – деді Қазақстанның лидері.