Қазақстан БРИКС-тың серіктесі болады: бұл ақпаратты Сыртқы істер министрлігі растады.

2025 жылдан бастап Қазақстан БРИКС халықаралық ұйымының серіктес елі болады. Бұл ақпаратты Қазақстан Республикасының Сыртқы істер министрлігі растады.

https://www.nur.kz/politics/universe/2204130-kazahstan-stanet-partnerom-briks-s-2025-goda/2024-12-24 08:27:12

ТАСС-тың хабарлауынша, Ресей Федерациясының президентінің көмекшісі Юрий Ушаков 2025 жылдың 1 қаңтарынан бастап 13 мемлекет БРИКС серіктес елдері болып ресми түрде танылатынын мәлімдеді. Оның ішінде Қазақстан да аталды. Оның айтуынша, келісімдер БРИКС саммиті барысында Қазан қаласында жасалған.

NUR.KZ тілшісі пікір алу үшін Қазақстан Республикасының Сыртқы істер министрлігінің баспасөз қызметіне жүгінді. Олар 2025 жылдың 1 қаңтарынан бастап Қазақстан БРИКС елдерінің серіктесі болатынын растады.

Осы жылдың қазан айында ел президенті Қасым-Жомарт Тоқаев Ресей президенті Владимир Путиннің шақыруымен Қазан қаласына БРИКС мемлекет басшыларының XVI саммитіне жұмыс сапарымен барғанын еске саламыз. Сапар барысында Тоқаев Владимир Путинмен және басқа да әлемдік көшбасшылармен кездесті.

Саммит кезінде Тоқаев Таяу Шығыс пен Украинадағы жағдай туралы пікірін білдірді. Өз сөзінде президент Қазақстан үшін БРИКС-ке қатысушы әр мемлекетпен шын мәнінде достық қарым-қатынастың орнағаны маңызды екенін атап өтті. Ол көпжақты БРИКС күш-жігері БҰҰ-ның қызметін үйлесімді толықтыратынын да қосты.

Ресми сайтта БРИКС - Бразилия Федеративтік Республикасы, Ресей Федерациясы, Үндістан Республикасы, Қытай Халық Республикасы және Оңтүстік Африка Республикасынан тұратын бейресми мемлекеттер тобы екендігі айтылған. БРИКС құрылуын Ресей жағы бастамашылық етті.