Алматыда 2024 жылдың соңына дейін 50 мың бейнекамера Біртұтас бейнемониторинг жүйесіне (ББЖ) қосылатын болады, деп хабарлайды Kapital.kz бизнес ақпарат орталығының тілшісі мегаполистің цифрландыру басқармасының мәліметіне сілтеме жасап.
«Жыл басынан бері әкімдіктің жобалық офисінің қолдауымен 15 мың камераны ескере отырып, 45 мың камера қосылды. 209 жеке және 613 мемлекеттік нысаннан бейнеағындар шығарылған. Алматыда жол қауіпсіздігін қамтамасыз ету үшін 300 «Сергек» аппараттық-бағдарламалық кешені орнатылды. Осылайша, қазіргі уақытта 1 641 АПК жұмыс істеп тұр», - делінген хабарламада.
Сондай-ақ, жылдың соңына дейін 71 денсаулық сақтау нысанында «Кешенді қауіпсіздік жүйесі» жобасы жүзеге асырылады.
Алматыдағы Біртұтас бейнемониторинг жүйесі 2022 жылы іске қосылды. ББЖ жобасының басты мақсаты – барлық қалалық бейнебақылау камераларын бір платформаға біріктіру, бұл уақытында бейнеаналитика қалыптастыру және алынған бейнеағындарды көп рет қолдану үшін қажет.
Естеріңізге сала кетейік, жыл басында Алматыға жұмыс сапары барысында президент Қасым-Жомарт Тоқаев мегаполистің өмірі туралы ақпарат алуға мүмкіндік беретін қаладағы Жағдайлар орталығын қарап шықты. Әкім Ерболат Досаев мемлекет басшысына орталық Big Data талдауы негізінде сапалы шешімдер қабылдау үшін тиімді құрал болатынын айтты және Open Data концепциясын енгізуді ұсынды. «Жасанды интеллект азаматтардың, оның ішінде алматылықтардың әл-ауқатын арттыруға қызмет етуі тиіс. Сондықтан мен жасанды интеллект құралдарын енгізу жоспарыңызды қолдаймын. Бұл біріншіден. Екіншіден, қаладағы көлік жағдайына ерекше назар аудару қажет. Бұл көзге көрініп тұр. Актуалды мәселе. Мұнда жасанды интеллект өз рөлін ойнауы тиіс. Әрине, қауіпсіздік. Қауіпсіздік бірінші орында болуы керек», – деді Қазақстанның лидері.